|
கயிறு - மகளிர் தினத்திற்காக |
|
|
|
நிர்மலா
|
விபரம் தெரிந்த நாளாய்
உணர்ந்திருக்கும் கயிறு
கை கால் குரல் சிந்தனையென்று
நேரத்திற்கேற்ப நழுவி
இடம் மாறி இறுக்குமது
வெளிர் நிறத்தில் மெல்லியதொரு
நூலாய்க் கிடந்ததை
உரமேற்றி நிறமேற்றியதில்
அடர்ந்த சிகப்பில் இறுகிப் போனது
வாலிப நாட்களில்
தாயோடு படுக்கை பகிர்ந்தவன்
என்னோடு தாய்மடி பகிர்ந்தவன்
படுக்கை பகிர்பவன்
நண்பன் அவன் இவன்
எல்லோருக்குமுண்டு
ஒரு ஆண்கயிறு
அதிக தடிமனில்லாததாய்
அடர்ந்த நிறமேறாததாய்
இழுத்த இழுப்பிற்கெல்லாம்
இசைந்து கொடுப்பதாய்
உடலும் மனமும் தளர்ந்த
முதுகிழவியின் கயிற்றில்
உரமோ நிறமோ ஏற்றுவாரில்லை
பட்டத்தின் கயிறாய்
பாதுகாப்புக்கென்றாய்
நீளமாய் நூறு கதைகள்
திரும்பத் திரும்பச் சொன்னதில்
பறவைகள் பட்டங்களாகவே
வரித்துக் கொண்டன
நீள அகலமாய் பரந்த வானமும்
தேடித் தெரிய சிறகுகளிருக்கும் பிரக்ஞையற்று
கயிறு கட்டிய கால்களோடு
பத்திரமான(!) வானத்தில்
கயிற்றில் நுனி யாரிடமென்றறியாமல்
எப்போது வேண்டுமானாலும்
முடக்கப் படலாமென்ற எச்சரிக்கையுடனும்...
அறுக்க முடியாத கயிறொன்றில்லை
பறக்கத் தொடங்கினால் எல்லையுமில்லை...
|
