உலக மகளிர் தினம் ஒரு கொண்டாட்டமோ, பறைசாற்றுதலோ அல்ல. இன்றைய இளைய தலைமுறைப்பெண்கள் நினைக்கலாம், "எல்லா போராட்டங்களும் முடிந்துவிட்டன, பெண்களுக்கான விடிவு காலம் பிறந்துவிட்டது" என்று. ஆனால், கடந்த காலத்தில் வாழ்ந்த பெண்ணியவாதிகளுக்கு மட்டுமே தெரியும் அந்தப் போராட்டங்களின் நீண்ட வேதனையான கால கட்டம். கண்ணுக்கு முன் தெரியாத பிரச்சினைகளுக்குத் தீர்வு காண யாருமே நினைப்பதில்லை. பெண்களின் பிரச்சினைகளைப் பற்றி நாமும் தெரிந்துகொண்டு, உலகுக்கும் தெரியப்படுத்துவதற்கான நாள்தான் மகளிர் தினம். போராட்டங்கள் இன்னும் முடியடையவில்லை. இன்றும் அரசியல், வர்த்தகம் போன்ற துறைகளில் பெண்கள் அதிகம் இல்லை. உலக அளவில் பெண்களுக்கான கல்வி, சுகாதாரம், தம்மேலான வன்முறையை எதிர்கொள்ளுதல் ஆகியவற்றில் பெண்கள் பின் தங்கியே இருக்கிறார்கள். குடும்பம், வேலை என்று மின்னல் வேகத்தில் ஓடிக்கொண்டிருக்கும் நம் அவசர வாழ்க்கையில் இப்போராட்டங்களைப் பற்றியும், சாதித்ததைப் பற்றியும் சாதிக்கவேண்டியவைப் பற்றியும் சிந்தித்துப் பார்ப்பதற்கு நேரம் இருப்பதில்லை. வருடத்தில் ஒரு நாளாவது இதற்கென ஒதுக்கி உலகத்தின் பார்வையைப் பெண்களின் பக்கம் திருப்புவதற்கு இந்த மகளிர் தினம் தேவை தான். மகளிர் தினத்தை முன்னிட்டு உலகெங்கும் நடக்கும் கருத்தரங்குகள், விழாக்கள், இணையத்தில் எழுதப்படும் கட்டுரைகள், அங்கே பறிமாறிக்கொள்ளப்படும் செய்திகள் இவையெல்லாம் மக்களின் சிந்தனைகளைத் தூண்டி விடும். நீங்களோ உங்கள் பக்கத்து வீட்டுக்காரரோ பெண்களைப் பற்றிய புதிய செய்தி ஒன்றை அன்று தெரிந்துகொள்ள வாய்ப்பிருக்கிறது. அன்றிலிருந்து பெண்கள் தொடங்கும் தொழில்களுக்கு உதவி செய்வதென ஒருவர் முடிவு செய்யலாம். மக்கள் தொகையில் பாதிக்குமேல் பெண்கள் இருக்கும்போது, அரசுப்பதவிகளில் பெண்களின் எண்ணிக்கை ஏன் அதிகமாக இல்லை என்கிற கேள்வி ஒருவர் மனதில் அன்று தோன்றி, வரும் தேர்தலில் ஒரு பெண் வேட்பாளருக்குப் போட்டியிட அவர் திட்டமிடலாம். இனி தன் மனைவிக்கு வீட்டு வேலைகளில் உதவி செய்யவேண்டும் என்று ஓர் ஆண் மனம் மாறலாம். இப்படி சிற்சில மனமாற்றங்களையும் மாறுதல்களையும் மகளிர் தினம் ஏற்படுத்துமேயானால், எத்தனை முறை வேண்டுமானாலும் மகளிர் தினங்கள் கொண்டாடலாம்.

மகளிர் தினத்தையொட்டி ஏராளமான பதிவுகள், ஆக்கப்பூர்வமான கருத்துக்கள், புதிய கோணங்கள், அதிரடி விவாதங்கள் என தமிழ்மணம் ஒரு வாரமாக களைகட்டியிருந்தது.தமிழ்நாட்டில் பிரபலமான, திறமையான வழக்கறிஞரும், பெண்ணுரிமைக்காகப் பல வகைகளிற் பாடுபட்டு வருபவருமான அருள்மொழி அவர்கள் மகளிர் தினத்தை முன்னிட்டு பூங்காவிற்காக ஒரு சிறப்பு நேர்காணல் தந்திருக்கிறார். இந்நேர்காணலுக்கான அனைத்துக் கேள்விகளும் பதிவர் செல்வநாயகியாற் தயாரிக்கப்பட்டவை. இந்நேர்காணலின் முதற்பகுதியை இந்த இதழில் அளிக்கிறோம். அடுத்த பகுதி அடுத்த பூங்கா இதழில் வெளிவரும். பேட்டியளித்த அருள்மொழிக்கும், கேள்விகளைத் தயாரித்த செல்வநாயகி, தமிழ்நதி மற்றும்
ஜெஸிலா  அவர்களுக்கும் எங்களின் மனமார்ந்த நன்றி.

தமிழ் இலக்கியங்கள் பெண்களை 'கற்பு', 'பதி விரதம்' போன்ற மூடநம்பிக்கைகளால் முடக்கிவைத்திருந்ததை தமிழியின் 'தினம் மகளிர் தினம்' பதிவு சுட்டிக்காட்டுகிறது. பெரியார், பாரதியார் போன்றவர்களின் பெண் உரிமைக்குரல்கள் சமூகத்தைச் சிந்திக்கவைத்தன. விதவை வாழ்க்கையின் வேதனை, இளம் வயது திருமணம், கல்வி மறுப்பு போன்றவை குறைந்துவிட்டதென்று நம்பிக்கையூட்டும் தமிழி, அடுத்து, பெண்ணியம், பெண் விடுதலை என்று பேசிக்கொண்டிருந்தவர்களும் குறைந்துவிட்டார்கள் என்று சொல்லி சற்றே நம் நம்பிக்கை குறைத்து, பின், "பேசிக்கொண்டிருந்தவர்கள் இப்போது காரியத்தில் இறங்கிவிட்டார்கள்" என்று சொல்லி மீண்டும் நம்மை நிமிர வைக்கிறார்.