காலங்கள்தோறும் ஒரு குமுகாயத்தில் நிகழும் அக மற்றும் புற மாற்றங்களைப் பதிந்து வைப்பதில் மொழிக்கு முக்கியமான இடமுண்டு. நீண்ட நெடிய பாரம்பரியத்தின் கலை, கல்வி, அரசியல் முதலான அறிவாதாரங்களை அடுத்தடுத்த தலைமுறைகளுக்கு எடுத்தியம்புவதன் மூலம் மக்களும், மொழியும் தொடர்ந்து பரிணமித்தபடி இருக்கிறார்கள். இதனாலேயே தலைமுறைகளின் வழியே ஓடும் மொழி என்ற இந்தப் பொது இழை முக்கியத்துவம் பெறுகிறது. அந்த முக்கியத்துவமே மொழியினைச் சுற்றிய அதிகார மையங்கள் நிறுவப்படுவதற்கும் காரணமாகிப் போனது. மொழியின் சாற்றினைப் பருகுவதற்கும், தனக்கான விடுதலையைத் தேடிக் கொள்வதற்கும் தனிமனிதர்கள் இத்தகைய அதிகார மையங்களின் குறுக்கீடுகளைக் கடந்தே பயணிக்க வேண்டியிருக்கிறது. செவ்வியல் மொழியான தமிழ், தனது வாழ்நாளில் எத்தனையோ அதிகார மையங்களையும், தன்னை அழித்தொழிக்க முனையும் மையங்களையும் கண்டிருக்கிறது. தமிழின் தத்துவ வளமும், இலக்கிய அழகும், மருத்துவம் முதலான கலைகளில் பதியப்பட்டிருக்கும் தேர்ந்த அறிவும் இன்னவான பிறவற்றாலுமே தமிழ் தன்னைக் காத்துக்கொண்டு நிற்கிறது. மேலும், மரபுகளை முன்வைக்கும் தமிழே அவற்றுக்கு எதிரான மரபுகளையும் வளர்ப்பதன் மூலமும் நெடுங்காலமாக சமநிலையைப் பேணித் தன் நிலைத்தன்மையை உறுதிசெய்துகொண்டுள்ளது. மரபுக் கலப்பின் ஒரு வடிவமாக மார்க்சியக் கோட்பாடுகளைத் தமிழர்தம் மரபுகளுடன் இணைப்பதன் மூலம் தனிமனித விடுதலை, சுரண்டலற்ற பொதுவாழ்வு என்பவற்றைக் குறித்தான பலரது கனவும் மெய்ப்படுமென்பதை சுகுணதிவாகரின் இடுகை உணர்த்தும்.

தமிழினைத் தொடர்ந்து காத்து வருவதில் திராவிட அரசுகள் எந்தவிதமான காத்திரமான எடுப்புகளையும் செய்யவில்லை என்பது வேதனையான உண்மை. ஆரம்பக்கல்வியில் தாய்மொழியின் அவசியம் குறித்து நாம் மீண்டும் மீண்டும் அரசுக்கு நினைவுறுத்தவேண்டிய நிலையிலிருக்கிறோம். இத்தகைய நிலையில் தாய்த்தமிழ்ப் பள்ளிகளைக் குறித்த மயிலாடுதுறை சிவாவின் இடுகை ஆறுதல் தருவதாகவும், அரசை முடுக்கிவிடுமாறு நம்மில் பலரையும் தூண்டுவதாகவும் அமைகிறது. அந்தப் பள்ளிகள் உண்டாக்கும் மாணவர்களைப் பற்றிய நம்பிக்கையை நம்முள் எழுப்புகிறது. இம்மாணவர்களை நினைக்கும்போதே, பிரபு ராஜதுரை "ஒரு நாள் பிரபலங்கள்?" இடுகையில் குறிப்பிட்டிருக்கும் "முதல் மாணவர்"களைப் பற்றிய கேள்விகளையும் ஓர்ந்து பார்க்க வேண்டும். ஒப்பீட்டளவில் எத்தகைய கல்வி முறை நல்விளைவுகளை உண்டாக்கும் என்பதை வரும் காலங்கள் முடிவு செய்ய வேண்டும். தமிழைத் தொடர்ந்த கண்ணியில் மேலும் சில இடுகைகளைக் குறிப்பிடுதல் அவசியம். முதலாவதாக, தமிழ் மொழியின் தேர்ந்த இலக்கியக் கருவூலங்களைச் சிதைப்பதன் மூலம் விடுதலையுணர்ச்சியை நசுக்க முயன்ற யாழ் நூலக எரிப்பு குறித்த ஆவணப்படமொன்றை சோமி தயாரித்து வருகிறார்; அவருக்கு உதவுமென்று நீங்கள் நினைக்கும் படங்களை, விபரங்களை அவருக்கு அனுப்பி வைக்கலாம். அவருடைய இடுகை இவ்வாரம் இடம்பெறுகிறது. இரண்டாவதாக,  தில்லைச் சம்பவம் குறித்து. தில்லைக் கோயிலுக்குள் தமிழுக்கெதிரான நடவடிக்கைகள், தமிழுணர்வையும், மதத்தைப் பற்றியும் மொழியைப் பற்றியுமான மக்களின் புரிதலையும் மேம்படுத்த உதவும். இச்சம்பவம் குறித்த கோவி.கண்ணன், வெட்டிப்பயல், சந்திப்பு ஆகியோரது இடுகைகள் உரத்துப் பேசுகின்றன. தமிழின் நெடிய வளத்தை இராம.கியின் பதிவுகளில் காணமுடியும். வேர்ச்சொற்களை அகழ்ந்து காட்டுவதில் இவரது திறன் வியக்கத்தக்கது. ஒரு சொல்லினை விளக்கும்போதே பலவற்றையும் சுட்டிக்காட்டி, ஒரு சுற்றுலாவைப் போல மனமகிழ வைப்பார். அவரது இனி என்ற இடுகை இவ்வாரம் சேர்க்கப்பட்டுள்ளது.