சிங்கள இனவாதம் ஈழத் தமிழர்களின் ஊடகங்களின் குரல்வளையை நசுக்குவதற்கு முனைகையில் , ஈழத் தமிழர்களின் வரலாறு பற்றிய தவறான செய்திகள் பரப்படுவது பற்றிய கரிசனையுடன் எழுதப்பட்டுள்ளது சயந்ததின் 'இது எவருடைய தவறாய் இருக்கலாம் ?' என்ற பதிவு. ஈழத்தமிழர்கள் தங்களது போராட்ட வரலாறு பற்றி மட்டுமல்லாது, தங்களது பூர்வீக தேசிய வரலாற்றையும் தமிழிலும் , ஆங்கிலத்திலும் இடையறாது தொகுப்பதும் , இற்றைப்படுத்துவதும், பரவலாக்குவதும் செய்தல் வேண்டும். அது இன்று அவர்களது போராட்டத்தின் ஒரு முக்கியமான கூறுகளில் ஒன்றாக உள்ளது.

வளர்மதியின் பின்நவீனத்துவம் பற்றிய உரையாடலுக்கான துவக்கமாக சில குறிப்புகள் பின்நவீனத்துவம் பற்றிய உரையாடலை முன்னெடுக்கும் முயற்சியில் எழுதப்ப்ட்டிருக்கிறது . மிகவும் ஆரோக்கியமான முறையில் ஒரு திறந்த உரையாடலுக்கான சூழலை இந்த முதல் பதிவே எழுப்பியிருப்பது மிகுந்த நம்பிக்கை அளிக்கிறது. பின்நவீனத்துவத்தைத் தமிழில் படித்துக்குழம்புவதை விட ஆங்கிலத்தில் (தட்டுத்தடுமாறி ) புரிந்துகொள்வது மேல் என்பது ஒருசாரரின் கருத்தாக இருக்கலாம். அதில் ஓரளவுக்கு நியாயமும் இருக்கலாம். ஆனால் தமிழ் அந்த ஒரு சாராரின் மொழிமட்டுமல்ல . இப்படியான முயற்சிகள் பல்கிப் பெருகும் போதே குழப்பம் குறைவான மொழியில் கருத்துக்கள் திரட்சி அடையவும், அது கூர்மையாக மாறவும் வழி பிறக்கும். அப்படியே ஒரு மொழியும் , அதன் மக்களும் இணைந்து வளர்கிறார்கள். எனவே வளர்மதி தனது கட்டுரையினை தொடர்ந்து எழுத பூங்கா வேண்டிக்கொள்கிறது . கோவி . கண்ணனின் ' தமிழகத்து தாழ்த்தப்பட்ட பெண் தெய்வங்கள்' என்ற கட்டுரை உண்மையில் நிறுவனப்படுத்தப்பட்டு வரும் இந்துசமயத்தினுள் இயங்கும் சூக்கும அரசியல் பற்றியது. நிறுவனப்படுத்தலின் மூலம் அதிகாரம் கட்டமைக்கப்படுகிறதெனின் அவ்வதிகாரம் படிநிலைகளைக் கொண்டிருக்கும் என்பதும் இயல்பான ஒன்றே ஆகும். இந்தப் படி நிலைகள் ஒரு மதத்தில் எவ்வாறு கட்டமைக்கப்படுகின்றன என்று அவதானிப்பதும் , அவற்றைக் கட்டுடைப்பதும் , அதிகாரத்துக்கு எதிரான குரல்களை ஒலிப்பவர்களின் கடமைகளில் ஒன்றாகும். இப்படியான முயற்சிகள் காலம் தாழ்ந்தே தமிழில் மேற்கொள்ளப்படுகின்றன என்றாலும் அவைகள் பரவலடைவதற்கான சாத்தியங்கள் இப்போது அதிகரித்திருப்பது ஆறுதல் அளிக்கிறது . மதியழகன் சுப்பையாவின் ' டார்ச் வியாபாரி' இவ்வகையில் நல்ல மொழிபெயர்ப்பு. அதே போல ராகவன் தம்பியின் மொழிபெயர்ப்பான ' போர் நாயும்' குறிப்பிடத்தக்கது.

இவையல்லாது தமிழ்நதியின் கவிதை பேசப்படாத யசோதரையின் துயரினைப் பேசுகிறது.  தாலி பற்றிய இராம.கி அவர்களின் பதிவுகளும் வழக்கம் போல முக்கியமானவையே. இந்தவாரம் தமிழ்மணம் வாசிப்பில் பகுதியை நமக்காக நண்பர் சுரதா தொகுத்தளித்திருக்கிறார். அவருக்கு பூங்கா தனது நன்றியைத் தெரிவித்துக்கொள்கிறது.  பழ.நெடுமாறனின் சிறப்புச் செவ்வியானது தவிர்க்க முடியாத பல காரணங்களால் இந்த வாரம் பூங்காவில் வெளிவரவில்லை. அத்ற்காக பூங்கா வாசகர்களிடம் வருத்தம் தெரிவிக்கிறது. இது தவிர இவ்வார பூங்கா இதழை பல நல்ல பதிவுகள் அலங்கரிக்கின்றன.